Non vos preguntarades durante todo este tempo que pasara cos cágados que tiñamos na aula? Pois ben, chegou o día de contarvos que pasou con eles... 👀
O último día de escola metinnos todos nunha botella grande de litro e medio con auga (pobriños, cos que eran!) e leveinos para casa. Non sabía se ían sobrevivir todos a viaxe, a auga turbia e case sen osíxeno...
Algúns morreron, moi pouquiños. A partir de aí volvín crearlle o seu hábitat, similar ao que tiñamos na clase, e pensei que algo de comer con consistencia lles tiña que ofrecer: comecei a darlles comida para peixe. Pois o invento non saíu tan mal porque aos poucos días, semanas máis ben, comezaron a sufrir a transformación:
- Primeiro saíronlle as patas de atrás
- Logo as de diante
- E, por último perderon a cola
- Xa non querían vivir somerxidas debaixo da auga e querían estar enriba das pedras.
O momento de soltalas e deixalas nunha charca tomeina cando unha tarde unha das pequenas ras estaba fóra da caixa transparente onde as tiña, arredor dos meus útiles de traballo (cadernos, bolígrafos, ordenador, etc.). Nese intre, entendín que xa era o momento de darlles máis espazo, máis liberdade e foi cando as deixei nunha auga estanca preto dun regato. Alí convivirían no seu hábitat natural co resto de ras que alí viven, en compañía, en harmonía coa natureza.
Foi unha mágoa non poder vivir ese proceso en directo pero para que vos fagades unha lixeira idea do que tiñamos que ter vivido en condicións habituais de escola, inclúovos este pequeno vídeo para que vos sintades parte da súa metamorfose. 🐸
